Viðskiptakjör

Viðskiptaskilmálar Vörumerkingar ehf vegna sölu og afhendingu á prentverki

Eftirfarandi skilmálar Vörumerkingar ehf. (hér eftir nefnt félagið) gilda um sölu og afhendingu á prentverki (hér eftir nefnt vara) til kaupanda, nema sérstaklega hafi verið skriflega samið um annað.

1. Tilboð og samningur

1.1. Tilboð er bindandi fyrir félagið í 14 daga frá tilboðsdegi.
1.2. Samningur telst vera kominn á og er bindandi þegar fyrir liggur pöntun frá kaupanda og/eða samþykkt tilboð og/eða skriflegur samningur.

2. Verð og verðgrundvöllur

2.1. Verð miðast við staðgreiðslu og er gefið upp án virðisaukaskatts nema annað sé tekið fram. Á reikningi er virðisaukaskattur færður sér.
2.2. Í fyrirfram uppgefnu verði eða tilboði er ekki innifalinn:
2.2.1. Aukavinna eða aukakostnaður sem fellur til, ef í ljós kemur eftir gildistöku samnings, að frumgögn frá kaupanda eru ófullnægjandi eða gölluð.
2.2.2. Aukakostnaður, sem hlýst af óskum kaupanda um breytingar eða viðbætur eftir gildistöku samnings.
2.2.3. Aukakostnaður, sem hlýst af seinkun eða öðrum orsökum, er rekja má til kaupanda, þ.m.t. vegna úttektar kaupanda á prentverki í vinnslu.

3. Greiðsla og greiðsluskilmálar

3.1. Greiðsluskilmálar miðast við staðgreiðslu nema um annað sé samið sérstaklega og skal þá kaupandi inna greiðslu af hendi áður en hann fær vöruna afhenta.
3.2. Félagið getur krafist þess að fá hluta eða allt kaupverð vörunnar greitt fyrirfram, áður en vinna við verkið hefst.
3.3. Sé kaupandi í reikningsviðskiptum með greiðslufrest skal hann inna greiðslu af hendi í samræmi við gildandi greiðsluskilmála. Vanskil geta leitt til endurskoðunar á greiðsluskilmálum og/eða tafa á vinnu við prentverk og/eða frestun á afhendingu vöru þar til vanskilin hafa verið gerð upp.
3.4. Sé reikningur ekki greiddur á eindaga er félaginu heimilt að krefja kaupanda um dráttarvexti frá gjalddaga og kostnað sem kann að falla til vegna innheimtuþóknunar.
3.5. Til tryggingar greiðslu hefur félagið rétt til að leggja hald á allar þær eigur kaupanda, sem eru í vörslu þess. Ef félagið hyggst beita slíkum haldsrétti skal það tilkynnt kaupanda skriflega. Greiði kaupandi ekki skuldina í kjölfar slíkrar tilkynningar er félaginu heimilt að selja eignirnar á hvern þann hátt sem er hagstæðast fyrir félagið hverju sinni.

4. Endurnýjun á prentplötum

4.1. Við endurprentun verks er félaginu heimilt hverju sinni að meta m.t.t. prentgæða hvort þörf er fyrir endurnýjun á prentplötum og sé svo, að endurgera og reikningsfæra á kaupanda nýjar prentplötur skv. verðskrá.

5. Afhending

5.1. Vara telst afhent þegar hún er komin á umsaminn afhendingarstað. Umsaminn afhendingarstaður getur verið á lager félagsins hyggist kaupandi sækja vöruna þangað.
5.2. Félaginu er heimilt að reikningsfæra og afhenda vöru, þegar hún er tilbúin, allt að viku fyrr en kveðið er á um í samningi.
5.3. Félagið ber ekki undir neinum kringumstæðum ábyrgð á hvers konar tjóni vegna seinkunar á afhendingu vöru sem rekja má til neðangreindra orsaka:
5.3.1. Ófullnægjandi frumgagna frá kaupanda.
5.3.2. Tafa af hálfu kaupanda á samþykki á próförk.
5.3.3. Breytinga á verkinu af hálfu kaupanda eftir að vinna er hafin við það af hálfu félagsins.
5.3.4. Tafa á greiðslum kaupanda eða vanskila á viðskiptareikningi hans hjá félaginu.
5.3.5. Gáleysis eða ásetnings kaupanda eða aðila á hans vegum.
5.3.6. Óviðráðanlegar orsakir (Force majeure).
5.4. Félagið skal svo fljótt sem auðið er láta kaupanda vita ef dráttur verður á umsaminni afhendingu. Verði slíkur dráttur á umsaminni afhendingu af hálfu félagsins ber það ekki undir neinum kringumstæðum ábyrgð á beinu, óbeinu eða afleiddu tjóni eða ágóðatapi s.s. rekstrartapi kaupanda eða taps sem kaupandi veldur þriðja aðila.

6. Upplagsfrávik

6.1. Félaginu er skylt að afhenda fullt upplag og sjá um að það sé í samræmi við pantað upplag að svo miklu leyti sem unnt er. Þó verða bæði kaupandi og félagið að sætta sig við 10% frávik til eða frá, sé verkið prentað í fjórlit eða vinnsla þess á annan hátt flókin og upplagið minna en 10.000 eintök. Sé upplagið stærra, má frávikið ekki vera meira en 5%. Hvað varðar aðra prentgripi, er áskilinn réttur til hæfilegra frávika með tilliti til eðlis prentgripsins, gæða og vandasemi í framleiðslu.
6.2. Félagið getur reikningsfært á einingarverði það magn sem umfram er og á sama hátt getur kaupandi óskað lækkunar á reikningi fyrir það magn sem uppá vantar í umsamið upplag.
6.3. Þurfi kaupandi ákveðið lágmarksupplag, skal taka það fram skriflega við pöntun. Ef afhent magn reynist minna en lágmarksupplag er kaupanda í sjálfsvald sett, hvort félagið skuli prenta viðbótarupplag kaupanda að skaðlausu eða hvort kaupandi tekur við upplaginu og greiðir fyrir afhent magn.

7. Gallar

7.1. Félagið ber ekki ábyrgð á villum og göllum, sem kaupandi, eða einhver í hans umboði hefur ekki leiðrétt í próförk hvort sem um rafræna- eða pappírspróförk er að ræða.
7.2. Telji kaupandi vöru gallaða, verður hann að tilkynna það strax og ekki seinna en 30 dögum eftir afhendingu. Kaupanda ber jafnframt að sýna fram á galla vörunnar og fjölda gallaðra eintaka af heildar upplagi. Sé ekki tilkynnt um tjón samkvæmt framansögðu skal réttur kaupanda til þess að krefja félagið um bætur vegna gallans falla niður sökum tómlætis.
7.3. Sé tilkynnt um galla á vöru innan framangreinds frests hefur félagið bæði skyldu og rétt til að bæta úr göllum, svo fremi það geti orðið innan hæfilegs tíma. Kaupandi skili gallaðri vöru nema um annað sé samið.
7.4. Ef galli er á vöru ber félagið ekki undir neinum kringumstæðum ábyrgð á beinu, óbeinu eða afleiddu tjóni eða ágóðatapi kaupanda s.s. rekstrartapi kaupanda eða taps sem kaupandi veldur þriðja aðila.

8. Takmörkun ábyrgðar

8.1. Hamli óviðráðanlegar orsakir (force majeure) afhendingu er félagið ekki skyldugt til að standa við umsaminn afhendingartíma og er ekki bótaskylt þótt afhending dragist eða bregðist.
8.2. Það er í höndum kaupanda að sjá um að eftirmyndun, prentun og útgáfa alls efnis, sem kaupandi útvegar í prentgripinn, sé lögleg og leyfileg. Kaupandi ber þannig ábyrgð á því að öllum innlendum og erlendum lögum og reglum og hvers konar fyrirmælum yfirvalda um notkun á efninu sé fullnægt eftir því sem við á. Kaupanda er auk þess sem að framan greinir skylt að bæta og halda félaginu skaðlausu vegna allra krafna frá þriðja aðila vegna afleiðinga þess að kaupandi hefur ekki tryggt sér leyfi til notkunar efnisins eða notkun þess er að öðru leyti ekki í samræmi við lög og reglur.
8.3. Félagið bætir ekki tjón á eigum kaupanda, sem eru í vörslu þess ef félagið er ekki að lögum ábyrgt fyrir tjóninu enda fái félagið það ekki bætt úr vátryggingu sinni. Fullunnin verk sem liggja hjá félaginu og ekki hafa verið sótt skv. samningi, eru á ábyrgð kaupanda og leysa verkkaupa ekki undan því að greiða verkið að fullu á meðan það er í vörslu félagsins.

9. Gagnavarsla

9.1. Félaginu ber að skila kaupanda upprunalegum gögnum hans milliliðalaust. Óski kaupandi eftir því sérstaklega geymir félagið upprunaleg gögn gegn geymslugjaldi. Um geymslu á tölvutækum gögnum skal semja í upphafi verks.
9.2. Ef verkkaupi óskar eftir afriti af fullunnum prentgrip á tölvutæku sniði er félaginu heimilt að krefjast greiðslu fyrir.

10. Notkun undirverktaka

10.1. Félagið hefur á eigin ábyrgð rétt til að láta undirverktaka vinna verk í heild eða að hluta. Allir undirverktakar eiga rétt á að bera fyrir sig öll ákvæði skilmála þessara eftir því sem við á.

11. Ágreiningur og lögsaga

11.1. Skilmálar þessir, þar á meðal undanþágur frá ábyrgð, varnir, réttindi og ábyrgðartakmarkanir, skulu gilda í hverskyns málarekstri gegn félaginu hvort sem krafan byggist á samningi eða skaðabótaskyldum verknaði utan samninga og jafnvel þótt bótaskylda hafi stofnast vegna ásetnings eða stórfellds gáleysis.
11.2. Rísi mál út af skilmálum þessum skal reka það fyrir Héraðsdómi Reykjaness.

12. Fyrning kröfu

12.1. Undir öllum kringumstæðum skal félagið vera laust undan ábyrgð nema mál sé höfðað innan 1 árs frá þeim tíma er vara er afhent eða félaginu bar að afhenda hana.

13. Gildistími

13.1. Þessir viðskiptaskilmálar voru samþykktir af stjórn félagsins í nóvember 2011 og taka gildi frá og með 1. desember 2011. Félagið áskilur sér rétt til þess að breyta þessum skilmálum hvenær sem er.

Svæði

Vörumerking ehf.  |  Suðurhraun 6a  |  210 Garðabæ  |  Sími: +354 414 2500  |  Fax: +354 575 8001  |  vorumerking@vorumerking.is